O enigma de Sempreviva

Unha vella caixa de galletas cun tesouro dentro…

Sempre pensei que os verdadeiros tesouros aparecen nos lugares máis impensados. Iso é precisamente o que lle acontece á protagonista desta historia.

Senda múdase cos seus pais á pequena aldea de Sempreviva. En Sempreviva só quedan tres veciños, xa anciáns. A terra é vermella e estéril e todo está contaminado. Os pais de Senda son biólogos e tratan de buscar unha solución para o lugar. Por iso, Senda pasa os días soa, coa única compaña de Sentinela, a súa neneira virtual. Alóxanse na vella escola, no mesmo lugar no que a súa avoa Úrsula traballou como mestra, moitos anos antes. E é precisamente no seu patio onde atopa o tesouro co que se inicia esta historia.

…e unha misteriosa inscrición na súa tapa…

Un día Senda descobre un pequeno brote verde que medra no patio da escola. Despois de tantos días de po e soidade, Senda decide rescatalo antes de que os seus pais o vexan e tomen mostras. Necesita ter un ser vivo ao seu carón. Porén, ao afundir a pa na terra para desenterralo, escoita un son metálico. Baixo a pequena planta atopa unha vella caixa de galletas. Na súa tapa hai unhas letras escritas a man que din “antes da terra vermella”. Dentro da caixa hai tres obxectos misteriosos: uns anteollos, un bote de terra limpa e un sobre con sementes de xirasol. Tamén unha carta na que o último neno de Sempreviva explica que eses son os seus tesouros máis valiosos.