¡Por suposto! De feito é unha das miñas principais actividades como escritora. E non só iso, senón que ademáis é algo que me encanta. Ter un momento para conectar cos lectores e lectoras mozos é unha fonte de inspiración para min.
Se queres que acuda ao teu centro a dar unha charla sobre os meus libros tes que contactar coa editorial correspondente, xa que son elas as que xestionan o meu calendario de visitas.
Actualmente dedícome á literatura, o que implica non só escribir, senón todo o relacionado coas miñas novelas, como dar charlas, obradoiros literarios, presentacións ou impartir cursos sobre temas relacionados coa miña profesión.
Noutros momentos da miña vida, traballei como docente de secundaria e como investigadora de literatura antiga na universidade.
Encantaríame! Ademais de escribir (e os meus gatos), a miña outra gran paixón na vida é viaxar, así que se podo combinar as miñas dúas grandes aficións, sería un soño feito realidade.
Contacta comigo ou coa editorial correspondente e falamos sobre se é posible e como organizalo.
Inspírome na realidade que me rodea, nas historias que me conta a xente e tamén nas miñas viaxes.
Esta é unha das preguntas que me fan acotío en charlas e encontros con lectores e lectoras. As miñas primeiras historias escribinas como agasallo de aniversario e nadal para a miña irmá pequena. A ela gustábanlle moito os contos de terror, por iso nelas aparecen fantasmas, meigas, vampiros e, por suposto, a miña irmá é a protagonista de case todas.
Máis adiante, no instituto, presenteime ao certame literario do meu concello. Esa experiencia axudoume a mellorar, a poñerme prazos na escrita e animoume a presentar as miñas obras a outros concursos.
Actualmente non teño un autor ou autora de referencia. Gústame tanto a literatura que me resulta imposible escoller. Ademais, cos anos fun pasando por diferentes etapas nas que me obsesionei con autores como Haruki Murakami, Arundhati Roy ou Yuval Noah Harari. E, como non, con Harry Potter.
Porén, si que podo dicirvos que de pequena o meu libro favorito era Matilda, de Roald Dahl. Esta novela influiu, sen dúbida, na inspiración para moitos dos personaxes que protagonizan as miñas historias e que, como Matilda, son especiais de algún modo.
Comecei presentándome ao premio literario que organiza o meu concello e esta experiencia deume azos para seguir participando noutros concursos.
No 2007, publiquei a miña primeira novela, Proxecto bolboreta, grazas ao Certame literario do Concello de Soutomaior.
En Galicia, obtiven o Premio Meiga Moira en dúas ocasións, o Jules Verne, Merlín e Raiña Lupa, que me permitiron seguir publicando obras e chegar a máis lectores e lectoras grazas á difusión que supoñen este tipo de galardóns. Algúns dos recoñecementos que máis ilusión me fixeron son os outorgados polos lectores e lectoras, como o premio Frei Martín Sarmiento, o premio dos Clubs de Lectura da Consellería de Educación de Galicia ou o premio Rosa dos Ventos, concedido polos alumnos e alumnas do Colegio Santiago Apóstolo de Bos Aires.
A nivel nacional, gañei o premio Lazarillo en 2018, o premio Anaya 2022 e o Premio A da Sociedad Colegial de Escritores ACE e do Grupo de Investigación de Literatura infantil da Universidad Complutense de Madrid (ELLI) no 2023. Ademais, algunhas das miñas novelas foron seleccionadas na Lista de Honor da OEPLI.
Encántame! Considero que a literatura infantil e xuvenil é un dos xéneros máis importantes do panorama literario actual. Desfruto dirixíndome a este público pola súa frescura, honestidade e lucidez. Síntome especialmente cómoda escribindo estas historias porque me permiten expresarme con liberdade.
Ainda que lin moito ao longo da miña vida, as lecturas da infancia e da adolescencia son as que máis me marcaron e creo que nunca se le con tanta intensidade como a estas idades.
