Unha historia ambientada no surleste asiático…
Alma de elefante nace dunha das miñas viaxes polo sur-leste asiático. Está dedicada ao neno ou á nena que perdeu o debuxo que eu atopei preto de Banteay Srei e que inspirou, sen sabelo, esta aventura.
Non podía ser de outro modo.
…que se inspira nun debuxo…
O templo de Banteay Srei é un dos máis singulares e afastados do complexo de templos de Angkor, en Cambodia. A primeira vez que o visitei, había un grupo de nenos e nenas nos seus arredores. Xogaban
a espantar unha bandada de garzas brancas. Alí atopei unha cuartilla escolar cun debuxo moi simple e bonito, feito a lapis por unha man infantil. Nel reflectíase a paisaxe que tiña ante os meus ollos: os campos de cultivo, as pequenas casas, o sol do amencer e un ceo sucado por un avión. Tamén aparecía un grupo de nenos e nenas que avanzaba por un camiño nun arrozal. Un deles ía subido nun gran animal que parecía un elefante.
Gardei o debuxo no meu diario de viaxes porque pensei que contaba unha historia á que so lle faltaban as palabras, como unha postal sen mensaxe.
