“Que me pare o corazón se te esquezo» de Andrea Maceiras
Que me pare o corazón se te esquezo é unha historia sobre ese mar que nos axita por dentro e que se abre paso alén das pantallas, escurecido polas peores sombras e, ao tempo, capaz de emitir a maior luz.
Grazas aos seus arriscados retos virais, Blue Shiva é a deusa das redes. Pero é unha deusa fráxil. A noite na que bota a camiñar polo borde dun edificio de dez pisos, no fondo desexa que a chuvia poña freo á súa ousadía. Pero Nordestal é unha cidade de vento. E Blue Shiva precipítase ao seu propio baleiro.
A nova da súa morte corre como a pólvora por todo internet. Ao outro lado da pantalla, Ada, incapaz de aceptar que Blue Shiva xa non exista, converte á súa xemelga Lúa en cómplice involuntaria dunha escura espiral de retos virais. Pola súa parte, Gabriel, amigo da infancia de Blue Shiva, regresa a Nordestal guiado polos latexos do seu corazón.