Miña querida Sherezade é un libro protagonizado por outro libro.
Unha historia moi especial.
Ser un libro é marabilloso. Agás cando chega a vellez. Entón decátaste de que estás feito un farrapo. Os personaxes que viven dentro de ti danche as costas porque non podes ofrecerlles a vida que eles queren. Caes enfermo. Tés tanta febre que súas tinta. E sentes a morte moi preto.
Eu non quero rematar así. Sei que aínda teño unha historia máis que contar. Non está nas miñas páxinas, senón gravada no meu corazón. E non é unha soa, senón moitas. Porque eu nacín en 1908 na Casa Editorial de Saturnino Calleja. Viaxei a Cuba no peto dun home rico e regresei na man dun pobre emigrado galego. Coñecín o amor e o desamor, sobrevivín a unha guerra civil, alimentei soños, transmitín mensaxes, salvei e fun salvado.
Eu gardei dentro de min a cor dourada de todos os desertos, a Simbad, Alí Babá e Aladino. Por iso che pido, miña querida Sherezade, que non marches, que agora sexas ti quen me escoite. Porque pode que esta sexa a miña última historia.”
Este é para min un dos libros máis especiais que escribín. Se amas os libros como eu o fago, se confías en que as palabras poden salvarche a vida como a Sherezade e en que a memoria é capaz de vencer o tempo porque a literatura contén o alento da eternidade, gustarache esta historia que percorre as vidas dos posuidores deste libro, que só quere contar unha última historia.
